Дарслик “Миллий ғоя, маънавият асослари ва ҳуқуқ таълими” йўналиши 3-умумкасбий фанлар блоки ўқув адабиётлари туркумига киради, давлат стандартлари ва намунавий ўқув дастури мазмунига мос. Китобда фалсафий тафаккур эволюциясининг таҳлили баробарида онтология, гносеология, ривожланиш, фалсафий антропология, праксиология ва глобаллашув масалаларининг назарий асослари янгиланган тафаккур нуқтаи назаридан кенг қамровли ёритиб берилган. Зеро, бугунги дунёда олам ва одам, билим ва фаолият, маданият ва маънавият масалаларида назария ва амалиётнинг бирлигига алоҳида эътибор берилиши лозим. Китоб “Миллий ғоя, маънавият асослари ва ҳуқуқ таълими” йўналиши ва барча олий ўқув юртларида фалсафа билан шуғулланувчи аспирантлар, тадқиқотчилар, ўқитувчилар ва умуман, фалсафа муаммолари билан қизиқувчиларга мўлжалланган. Муаллиф дарсликда баён этилган мулоҳазаларнинг мутлоқлигига даъво қилмайди. Бироқ ўз фикрларининг баёнида у, янги талаблар ва дунёнинг янгича талқинига алоҳида эътибор қаратган. Дарсликнинг давоми иккинчи китобда ифодаланган бўлиб, у барча мавзулар бўйича қўшимча ва тушунтирувчи матнлар (слайдлар), кроссвордлар, машқлар, тестлар тўпламидан иборат ўқув-услубий мажмуадир. У ўқув режасидаги жами 156 соатни қамраб олган маъруза, семинар ва мустақил иш машғулотларига тайёрланиш учун етарли билим манбаи бўла олади. Китоб муаллифи ўқувчилардан унга муносабатни ва такомиллаштириш бўйича таклифларни кутади: