Oila psixologiyasi zamonga xos tarzda yangi bilimlar bilan jadal rivojlanib borayotgan, jamiyat taraqqiyoti va ma’naviy barqarorlik uchun kerak bo`lgan ilmiy fanning amaliy sohasidir. Pedagogika ta’lim yo`nalishi bo`yicha bakalavrlarning o`z faoliyatlarida oilaviy hayot va undagi murakkab o`zaro munosabatlarning qonuniyatlari, mexanizmlari va oilaga psixologik xizmat ko`rsatish bugungi kunning dolzarb muammolaridan biridir. Zero, oila psixologiyasi fan tarmog’i sifatida bo`lg’usi pedagoglar tomonidan o`zlashtirilishi ularning professional mahoratlarini o`stirish, mustaqil oilaviy hayotga tayyor bo`lishlari va fuqarolik jamiyatining yoshlarini oilani muqaddas bilishga o`rgatish orqali ularni ma’naviy qadriyatlarga hurmat ruhida tarbiyalashga yordam beradi.